Kryetari i Gjykatës Kushtetuese të Kosovës, Nexhmi Rexhepi, ka pritur në takim Zëvendësdrejtorin e Divizionit për Ballkanin Perëndimor në Ministrinë Federale të Punëve të Jashtme të Gjermanisë, Matthias Conrad, si dhe zëvendësambasadorin e Gjermanisë në Kosovë, Christian Böttcher.
Sipas njoftimit zyrtar, Rexhepi e ka informuar Conradin për punën e deritanishme të Gjykatës Kushtetuese, për vendimet me rëndësi dhe ndikimin që ato kanë pasur në zhvillimin e demokracisë në Kosovë, si dhe për bashkëpunimin e mirë me Gjykatën Kushtetuese Federale të Gjermanisë.
Ai ka shprehur falënderimin dhe mirënjohjen e tij për mbështetjen e vazhdueshme që Qeveria gjermane i ka ofruar Gjykatës Kushtetuese të Kosovës që nga vitet e para të themelimit, veçanërisht në zhvillimin e kapaciteteve profesionale të stafit.
Nga ana e tij, Conrad ka vlerësuar progresin e Kosovës ndër vite, si dhe ka konfirmuar zotimin e Gjermanisë për thellimin e bashkëpunimit institucional në të gjitha nivelet, me theks të veçantë në sektorin e drejtësisë dhe forcimin e sundimit të ligjit./teve1.info/
