Galatasaray ka hyrë fuqishëm në garë për njërin nga portierët më të afirmuar në futbollin europian: Marc-André ter Stegen.
Pas finalizimit të transferimit të Leroy Sané, i cili vendosi të largohej nga Bayern Munich, skuadra nga Stambolli tani synon të forcojë portën pas largimit të Fernando Musleras.
Klubi turk dëshiron të vazhdojë të përforcojë skuadrën me lojtarë të nivelit të lartë dhe ka përqendruar vëmendjen te portieri i Barcelonës.
Sipas asaj që raporton “Sport”, Galatasaray ka paraqitur tashmë një ofertë zyrtare si ndaj ambientit të lojtarit, ashtu edhe ndaj klubit katalanas.
Oferta përfshin një pagë neto vjetore prej 5 milionë eurosh për Ter Stegen, pak më pak se sa ai fiton aktualisht te Barça, por që mund të jetë joshëse në një projekt ku ai konsiderohet lojtar kyç.
Qëllimi i klubit turk është të negociojë me Barcelonën për një transferim me kosto të ulët ose, në alternativë, për një huazim me të drejtë blerjeje.
Edhe pse nga “Camp Nou” nuk ka sinjale të qarta për një ndarje me portierin gjerman, shfaqja e Joan García ka ngritur pikëpyetje për rolin afatmesëm të Ter Stegen si titullar.
Në Stamboll janë të bindur se afrimet e figurave si Sané, si dhe mundësia reale për të sjellë edhe Ilkay Gündogan, mund ta tundojnë Ter Stegen të bashkohet me një projekt ambicioz me synime europiane.
Për momentin, portieri mbetet i vendosur të qëndrojë në Barcelonë, por interesi i Galatasarayt është serioz dhe mund të shënojë një nga lëvizjet më befasuese të merkatos së ardhshme verore.
