Futbollistet e Dukagjinit e kanë fituar Kupën e Kosovës në futboll për këtë edicion.
Dukagjini të mërkurën fitoi në ekzekutimin e penalltive ndaj KFV Prishtinës me rezultatin 5:4, në ekzekutimin e penalltive.
Portierja e Dukagjinit, Lavdie Behramaj e priti penalltinë e Erjona Mehmetit dhe ia siguroi trofeun e Kupës skuadrës klinase.
Loja e rregullt dhe vazhdimet u mbyllën 1:1.
Olsa Kuçi që në minutën e pestë i dha Dukagjinit epërsinë 1:0, ndërsa Rreze Gashi shënoi për prishtinaset, tre minuta pa u mbyllur ndeshja dhe e dërgoi ndeshjen në vazhdime.
Në vazhdimet dy herë nga 15 minuta, dy skuadrat patën raste për shënim dhe qëlluan shtyllën nga një herë. Por, gola nuk u realizuan më.
Në ekzekutimin e penalltive te Dukagjini të sakta ishin të pesë lojtaret, Xhenifer Pjetri, Ema Kadriu, Ylberina Berishaj, Arbesa Kastrati dhe Albina Hoti. Ndërkohë, te KFV Prishtina shënuan Liridona Leka, Rreze Gashi, Fatime Beha dhe Ema Hoti. Ndërkohë, dështoi Mehmeti në penalltinë e pestë dhe të fundit.
