Forca e Sigurisë së Kosovës dhe Ushtria e Republikës së Turqisë kanë zhvilluar një trajnim të përbashkët në fushën e kërkim-shpëtimit, në kuadër të bashkëpunimit ndërmjet dy palëve.
Trajnimi ka përfshirë kërkim-shpëtimin urban, operacionet në terrene malore, si dhe angazhimin e njësive K9 në operacionet e kërkim-shpëtimit.
Sipas FSK-së, qëllimi i këtij trajnimi ishte avancimi i njohurive dhe aftësive profesionale të pjesëmarrësve, forcimi i bashkëpunimit ndërmjet ekipeve dhe shkëmbimi i përvojave praktike në situata emergjente.
Gjatë aktiviteteve janë zhvilluar ushtrime teorike dhe praktike, përfshirë teknikat e kërkimit dhe shpëtimit në ndërtesa të dëmtuara, operacionet në terrene malore dhe përdorimin e qenve të trajnuar për kërkim-shpëtim.
Po ashtu, pjesë e trajnimit kanë qenë edhe procedurat e koordinimit dhe reagimit në situata emergjente.
Sipas FSK-së, aktiviteti ka kontribuar në rritjen e kapaciteteve profesionale dhe gatishmërisë operacionale, si dhe në forcimin e ndërveprueshmërisë së ekipeve kosovare me partnerët në fushën e kërkim-shpëtimit./teve1.info/
