Pas fitores bindëse 6-0 në një ndeshje miqësore ndaj Verden, Werder Bremen jo vetëm që tregoi formë të mirë për nisjen e sezonit, por u përball edhe me një lajm të pakëndshëm në merkato: Fisnik Asllani, sulmuesi ofensiv i TSG Hoffenheim, ka vendosur t’i thotë “jo” transferimit te Bremen.
Lajmin e konfirmoi trajneri Horst Steffen, i cili e njeh mirë futbollistin shqiptar nga sezoni i kaluar, kur punuan së bashku te SV Elversberg, klub me të cilin bënë një kampanjë të jashtëzakonshme në Bundesliga 2.
Sipas raporteve të shumta nga Gjermania, Hoffenheim ka arritur ta bindë Asllanin të rinovojë kontratën deri në vitin 2029, duke i dhënë një sinjal të qartë për rëndësinë që ka në planet afatgjata të klubit.
Në deklaratën e tij pas ndeshjes, Steffen u shpreh:
“Nuk e di nëse vendimi i tij është përfundimtar. Por nëse ai ka vendosur të mos vijë te ne, atëherë kjo është situata.
Ia kemi shprehur interesimin tonë – mendoj se ishte e merituar pas gjithçkaje që kemi kaluar bashkë.
Në fund të fundit, secili merr vendimin e vet dhe ndjek rrugën e vet. Nuk e marr personale. Deri tani nuk kam dëgjuar asgjë zyrtare – kështu që do të presim e do të shohim.”
Asllani, 22-vjeçar me origjinë shqiptare, është konsideruar prej kohësh si një nga talentet më premtues të futbollit gjerman. Sezonin e kaluar ai spikati në rolin e mesfushorit sulmues dhe është në qendër të projektit të ri të Hoffenheim.
Ndërsa Werder Bremen duhet të vazhdojë kërkimin për përforcime në fazën ofensive, duket se Asllani ka zgjedhur të besojë në projektin e klubit të tij aktual, ku mund të ketë më shumë minuta dhe një rol kyç në Bundesliga.
