Federata e Futbollit e Serbisë ka reaguar pas ndeshjes Shqipëri – Serbi, të luajtur të shtunën mbrëma në “Air Albania” në Tiranë. Ndeshja kualifikuese për Botëror përfundoi pa gola.
Federata serbe ka shkruar të hënën se pritja nga FSHF-ja ishte e mirë, ndërsa ka dënuar sjelljet e shikuesve.
Federata serbe ka shkruar se humbjen më të madhe e pësoi futbolli.
“Para të vërtetës së shëmtuar me të cilën u përballën lojtarët tanë në fushë, dëshirojmë të theksojmë faktin që i gjithë delegacioni i Federatës serbe të futbollit, nga minuta e parë e deri te e fundit e qëndrimit në kryeqendrën shqiptare ka hasur në pritje të jashtëzakonshme nga Federata Shqiptare e Futbollit dhe presidenti Armand Duka. Nga arritja në aeroport e deri te largimi nga Tirana kemi ndier respekt dhe kujdes. Për fat të keq skenat nga tribunat që bota e futbollit nuk dëshiron t’i shohë, skena që UEFA i lufton vazhdimisht, kanë vënë njollë të madhe në ngjarjet korrekte në fushën e lojës. Federata serbe dënon ashpër shpërthimet politike të urrejtjes, përmes formave të ndryshme të provokimeve dhe thirrjeve të turpshme për organizatat terroriste dhe thirrjet për krime të reja. Pasi fjalët nuk mjaftuan, pasoi kërcënimi fizik ndaj lojtarëve tanë”, shkruan në komunikatën e federatës serbe, të publikuar të hënën.
Federata serbe ka shkruar se janë hedhur para të metalit, shishe dhe gota të mbushura. FSS-ja i ka quajtur të turpshme skenat në “Air Albania”, ndërsa ka shkruar se ato kërcënojnë edhe principet e respektit ndërkombëtar dhe tolerancës që futbolli duhet të promovojë.
Federata serbe ka falënderuar FSHF-në për mikëpritjen, ndërsa ka dënuar gjithë atë që është dëgjuar dhe është parë në tribuna.
Në fakt ndeshja Shqipëri – Serbi përfundoi pa asnjë incident serioz, ndërsa thirrjet anti-serbe nuk janë ndalur. Ka pasur edhe hedhje në disa raste, por rrjedha e ndeshjes nuk është rrezikuar.
