Ambasadori i Kosovës në Gjermani, Faruk Ajeti, ka njoftuar se platforma globale e udhëtimeve Expedia ka korrigjuar pasaktësitë në faqen e saj lidhur me Kosovën.
Sipas tij, Republika e Kosovës tashmë paraqitet si shtet i pavarur, ndërsa Prishtina është shënuar saktë, duke zëvendësuar emërtimin e mëparshëm të gabuar “Priština”.
Ajeti e ka cilësuar këtë zhvillim si një lajm të jashtëzakonshëm, duke theksuar se ndryshimi është arritur falë angazhimit të ekipit diplomatik të Kosovës.
“Lajm i jashtëzakonshëm! Falë angazhimit tonë diplomatik, tani e tutje edhe Expedia, platforma gjigante globale e udhëtimeve online, ka korrigjuar pasaktësitë në faqen e saj. Republika e Kosovës tashmë paraqitet si shtet i pavarur dhe kryeqyteti ynë, Prishtina, është shënuar saktë, duke zëvendësuar emërtimin e gabuar “Priština”, ka deklaruar ai.
Expedia konsiderohet një nga platformat më të mëdha të udhëtimit në botë, duke ofruar paketa të ndryshme për miliona përdorues globalë. Në kuadër të saj janë edhe platforma të njohura si Hotels.com dhe Vrbo.
“Në të gjitha këto platforma, që kanë miliona klientë në mbarë botën, Republika jonë figuron ashtu siç duhet”, ka përfunduar Ajeti.
