Mesfushori defensiv, Amadou Onana pritet të jetë largimi i parë nga skuadra e Evertonit me të përfunduar edicioni aktual.
Mediumet britanike kanë raportuar të hënën se Onana tashmë i ka bërë me dije Evertonit se dëshiron të largohet në verë dhe klubi anglez tashmë i ka caktuar çmimin.
Për kartonin e belgut 22-vjeçar, Evertoni po kërkon rreth 55 milionë euro kurse interesim për Onanan tashmë kanë shfaqur Barcelona e Bayern Muncheni.
Onana në verën e vitit 2022 iu bashkua Evertonit nga Lille i Francës, ndërsa karrierë ka bërë edhe në Gjermani te skuadra e Hamburgut. Në 31 ndeshje në të gjitha garat këtë edicion, Onana ka 3 gola e 1 asistim për Evertonin, ekip me të cilin ka kontratë deri në vitin 2027.
Onana ka edhe 12 paraqitje me Belgjikën, për të cilën debutoi në qershor të vitit 2022.
