Me intonimin e himnit kombëtar, nisi ceremonia e organizuar për Ditën e Flamurit.
Nxënësit e Shkollës Fillore “Emin Duraku” në Prishtinë për nder të 28 nëntorit, Ditës së Pavarësisë së Shqipërisë, zbuluan ekspozitën me punime të bëra nga ta bashkë me mësimdhënësit.
Në korridorin e kësaj shkolle, tashmë janë të vendosura portretet e figurave që kanë kontribuar ndër vite për çështjen kombëtare.
E profesoresha e artit, Adelina Bega e cila i punoi këto bashkë me nxënësit, thotë se është e lumtur me arritjen e nxënësve në realizmin e këtyre punimeve.
“Bashkëpunimi ka qenë shumë i mirë, ka mbetë edhe një pjesë e madhe e punëve e cila nuk kemi arritë me ekspozu, në ekspozitë janë vetëm veprat që janë më të mirat prej më të mirave, ndërsa pesë prej veprave më të mira, kam arritë edhe me i kuru me fjalë dhe motivim përkatës për secilën vepër… Janë shumë premtues saqë shpesh herë mendoj që është e pamundur me arritë me pasë qasi aftësi një nxënës i klasës së gjashtë, shtatë etj”, tha ajo.
Në një nga hapësirat e shkollës, u zbulua edhe një odë e improvizuar me pajisjet e një ode klasike shqiptare.
“Puna është me të vërtetë e madhe, është një grumbullim i mjeteve disavjeçare për me ardhë deri te kjo ditë, deri te ky oxhak. Së fundmi është bërë improvizimi i këtij oxhaku që është realizuar nga unë, ndërsa mjetet janë grumbullim edhe i prindërve, edhe i shoqërisë, edhe i të gjitha mjeteve sepse i kemi grumbullu dhe bërë në shkollën tonë. Oxhaku ka rënë mjaft mirë, po duket si e vërtetë dhe jemi shumë të kënaqur me të”, tha Ismet Fazliu, profesor i artit në shkollën “Emin Duraku”.
I lumtur për punën e bërë është edhe drejtori, Visar Osmani i cili tregon se kjo ekspozitë do të vazhdojë të qëndrojë në këto hapësira.
“Mezi s’kanë pritë, çka shihet këtu është punë e nxënësve nën kujdesin e mësimdhënësve, të jemi të qartë, grupit të historianëve, të piktorëve të rinj, ata kanë arritë ta realizojnë këtë ekspozitë, formati i organizimit të tillë është i veçantë në shkollën tonë sepse bëhet diçka e tillë për herë të parë dhe kjo është bërë se del bukur dhe siç po e shihni edhe vetë të gjithë janë të lumtur dhe ne posaqërisht që ia kemi arritë qëllimin tonë”, tha ai.
Nga Drejtoria iu ndanë mirënjohje edhe dy mësuesve që janë veteran të Ushtrisë Çlirimtare të Kosovës, pasi 28-nëntori shënon edhe daljen e parë të ushtrisë në skenë.
