Dogana e Kosovës ka konfiskuar 952,54 gramë ari të përpunuar, me vlerë të përafërt prej 120 mijë eurosh, gjatë kontrolleve të zhvilluara në kuadër të aktiviteteve për luftimin e kontrabandës dhe tregtisë së paligjshme.
Sipas njoftimit të Doganës, ari është zbuluar në njërën prej argjendarive, ndërsa ndaj rastit janë ndërmarrë veprimet përkatëse në përputhje me legjislacionin doganor në fuqi.
“Gjatë kontrolleve të zhvilluara, në njërën prej argjendarive është zbuluar dhe konfiskuar një sasi prej 952,54 gramësh ari të përpunuar, me vlerë të përafërt prej 120,000 eurosh, për të cilin janë ndërmarrë veprimet përkatëse në përputhje me legjislacionin doganor në fuqi”, thuhet në njoftim.
Ndërkohë, gjatë kontrollit në një argjendari tjetër, është konstatuar prania e rreth pesë kilogramëve ari të pashenjëzuar, pa vulat përkatëse të kontrollit dhe shenjëzimit.
Për këtë rast, Dogana ka kërkuar asistencën e Inspektoratit kompetent të Ministrisë së Industrisë, Ndërmarrësisë dhe Tregtisë (MINT).
Sipas Doganës, inspektorët kanë marrë në trajtim sasinë e identifikuar të arit për të kryer procedurat e verifikimit dhe shenjëzimit, në përputhje me legjislacionin në fuqi.
Dogana e Kosovës ka bërë të ditur se kontrollet janë pjesë e aktiviteteve të vazhdueshme për parandalimin e kontrabandës, tregtisë së paligjshme dhe mbrojtjen e tregut./teve1.info/
