Vjen edhe drita jeshile nga Federata Italiane e Futbollit, dueli mes Milanit dhe Komos, i planifikuar për t’u luajtur më 7-8 shkurt të vitit 2026, i vlefshëm për javën e 26-të të Serisë A, me shumë gjasa do të zhvillohet në Perth të Australisë.
Pas kërkesës nga Lega Serie A, të cilën FIGC e miratoi sot, disa hapa janë ende në pritje në lidhje me autorizimet e tjera zyrtare.
Konkretisht, thuhet në njoftimin për shtyp, kërkohet miratimi zyrtar nga Federata Australiane e Futbollit, UEFA, Federata Aziatike e Futbollit dhe FIFA. Ky duhet të jetë një hap mjaft i thjeshtë, por miratimi zyrtar është ende në pritje.
Ndeshja është planifikuar të luhet në stadiumin Optus, një strukturë me 60 mijëvende që përdoret zakonisht për futbollin australian me rregulla, regbi dhe kriket. Qeveria e Australisë Perëndimore e ka bllokuar tashmë datën; tani, priten hapat e fundit. Kjo do të jetë një ndeshje historike: për herë të parë, një ligë e madhe evropiane do të luajë një ndeshje jashtë vendit. Dhe do të jetë Seria A.
