Kombëtarja e Kosovës në Kick-Box po merr pjesë në Kupën Botërore “Turkish WAKO World Cup”, e cila po mbahet në Antalya të Turqisë.
Në këtë ngjarje prestigjioze ndërkombëtare po marrin pjesë 43 shtete me gjithsej 2,985 garues nga e gjithë bota.
“Me kënaqësi ju njoftojmë se në ndeshjet kualifikuese, sportistët tanë: Artor Mehmeti – Senior (-71 kg) dhe Nart Mehmeti – Junior (-71 kg) kanë siguruar plasmanin në gjysmëfinale, pas paraqitjeve shumë bindëse dhe fitoreve me rezultat të pastër 3:0. Po ashtu, sportisti ynë: Art Dulaj – Junior (-67 kg) ka siguruar gjysmëfinalen pas një fitoreje spektakolare me KO (Knockout), duke dëshmuar nivel të lartë sportiv dhe përgatitje të shkëlqyer”, ka shkruar Federata e Kick-boxit të Kosovës në Facebook.
Këto rezultate paraqesin një sukses të rëndësishëm për sportin e kickbox-it në Kosovë dhe një prezantim dinjitoz të vendit tonë në arenën ndërkombëtare.
