Dua Lipa dhe Nicole Kidman ishin pa dyshim ndër figurat më të komentuara në sfilatën pranverë/verë 2026 të Chanel Haute Couture, e zhvilluar të martën gjatë Javës së Modës në Paris.
Prania e tyre nuk solli vetëm elegancë dhe stil, por edhe histori personale që shtuan kuriozitetin rreth eventit.
Nicole Kidman, 58 vjeçe, u shfaq e sofistikuar me një fustan midi të zi të zbukuruar me pupla, syze të errëta dhe këpucë klasike bardh e zi.
Ajo zuri vend në rreshtin e parë pranë Anna Wintour, duke tërhequr vëmendjen e fotografëve me një paraqitje plot vetëbesim dhe finesë.
Në kontrast të plotë, Dua Lipa i dha Parisit energji dhe ngjyra.
Këngëtarja 30-vjeçare u shfaq me një kombinim të guximshëm fundesh dhe xhaketash në nuanca të verdha dhe të kuqe, duke u ndalur herë pas here për të përshëndetur fansat jashtë ambientit të sfilatës, sipas raportimeve të DailyMail.
Ajo ishte e shoqëruar nga i fejuari i saj, aktori Callum Turner, me të cilin konfirmoi fejesën në qershor 2025.
Çifti u duk i relaksuar dhe i afërt, duke tërhequr vëmendjen po aq sa veshja e saj.
Eventi mblodhi edhe emra të tjerë të njohur të kinemasë, përfshirë Penelope Cruz, Claire Foy dhe Tilda Swinton.
Penelope Cruz, 51 vjeçe, zgjodhi një pamje klasike Chanel me xhaketë dhe fund në tone të errëta, duke ruajtur elegancën e saj karakteristike.
Megjithatë, prania e Nicole Kidman në Paris mori një tjetër dimension, pasi ajo erdhi vetëm pak ditë pas finalizimit të divorcit nga Keith Urban, pas 19 vitesh martesë.
Dokumentet gjyqësore tregojnë se ish-çifti ka rënë dakord të heqë dorë nga çdo mbështetje financiare reciproke, ndërsa kanë dy vajza, Sunday Rose 17 vjeçe dhe Faith Margaret 14 vjeçe.
Sipas marrëveshjes së prindërimit, Nicole do të kalojë pjesën më të madhe të vitit me fëmijët, plot 306 ditë, ndërsa Urban do të ketë 59 ditë në vit me to.
Ndërkohë, Dua Lipa ndau në Instagram një përmbledhje të momenteve më të rëndësishme të vitit 2025, ku nuk mungoi as unaza e fejesës me vlerë rreth 25 mijë paundë.
Ajo shprehu bindjen se jeta e saj “po bëhet gjithnjë e më e mirë”, duke reflektuar lumturinë dhe stabilitetin që duket se po e shoqëron këtë fazë të re të jetës së saj.
