Presidenti i Shteteve të Bashkuara të Amerikës, Donald Trump, ka reaguar lidhur me kalimin e dronëve rusë në hapësirën ajrore të Polonisë.
Përmes një postimi shumë të shkurtër në platformën “Truth Social”, Trump shkruan: “Çfarë po ndodh me Rusinë që po shkel hapësirën ajrore të Polonisë me dronë? Ja pra ku jemi!”.
Edhe pse një reagim i shkurtër, duket qartazi frustrimi i Trump-it ndaj Rusisë për këtë hap të ndërmarrë prej kësaj të fundit.
Jo vetëm frustrim, por ndoshta ky postim tregon edhe frikë e zhgënjim të Shtëpisë së Bardhë ndaj Putin.
Vetëm disa javë më parë, Trump dhe administrata e tij “festuan atë që u pa si një formë fitore” të politikës së jashtme, kur presidenti i SHBA-ve u takua me Putin në Alaska.
Duke parë që Rusia nuk zbrapset nga sulmet në Ukrainë, Trump konfirmoi se është i gatshëm për sanksione të tjera ndaj Putin.
Tashmë, mbetet për t’u parë se kur Trump do të aktivizojë këto sanksione që pas kalimit të dronëve në Poloni.
Polonia sakaq, ka kërkuar aktivizimin e nenit 4 të NATO-s, që i lejon shtetet anëtare të ngrenë një çështje para Këshillit të Atlantikut Verior. Pas kësaj, zhvillohen konsultime për të përcaktuar nëse është kërcënuar integriteti territorial, pavarësia politike ose siguria e një vendi anëtar.
Nga ana tjetër, Ministria e Jashtme ruse, akuzon Poloninë për përshkallëzimin e krizës në Ukrainë. Ministria e Jashtme gjithashtu konfirmoi se është e gatshme të marrë pjesë në çdo diskutim të mundshëm midis Rusisë dhe Polonisë.
Në një deklaratë të mëparshme, Ministria e Mbrojtjes e Rusisë tha se “nuk ishin planifikuar objektiva në territorin e Polonisë për t’u goditur”.
Ajo shtoi se rrezja maksimale e fluturimit të UAV-ve (dronëve) rusë të përdorur në sulm, të cilët dyshohet se kanë kaluar kufirin me Poloninë, nuk e kalon 700 km.
