Kampioni i Kosovës, Drita, ka shkruar histori këtë edicion duke u kualifikuar për herë të parë në rrethin e dytë të Ligës së Kampionëve. Pas një paraqitjeje mbresëlënëse në rrethin e parë ndaj Differdange 1-0 dhe 2-3, gjilanasit tani kanë përballë një sfidë të madhe ndaj gjigantit danez Copenhagen.
Tanimë UEFA ka ndarë edhe vazot, ku Drita ka mësuar kundërshtarët në rrethin e tretë nëse arrin të bëjë mrekulli për ta eliminuar Copenahgen.
Drita ndodhet në Grupin A së bashku me skuadrën daneze dhe fituesi i këtij dueli do të kalojë në rrethin e tretë të Ligës së Kampionëve. Kundërshtarët e mundshëm në atë fazë janë fituesit e përballjeve: Lech Poznan – Breidablik, Riga – Malmö dhe KuPS – Kairat.
Ky është një moment historik për klubin kosovar, që për herë të parë arrin në një fazë kaq të avancuar të garës më të madhe evropiane për klube. Përballja me Copenhagenin do të jetë një test i vërtetë për ambiciet dhe nivelin aktual të skuadrës.
Në rast se Drita nuk e kalon këtë fazë, rrugëtimi evropian nuk do të ndalet. Skuadra gjilanase do të zhvendoset në Ligën e Evropës, ku gjithashtu janë përcaktuar kundërshtarët e mundshëm në rast të eliminimit.
Në rrethin e tretë të Ligës së Evropës, Drita do të përballet me një nga humbësit e këtyre përballjeve: Lech Poznan – Breidablik, Shkëndija – Steaua Bukuresht dhe Hamrun Spartans – Dynamo Kyiv. Çifte me përvojë dhe cilësi që premtojnë duele të vështira, por interesante.
Pavarësisht sfidave, kualifikimi në rrethin e dytë ka rritur ndjeshëm moralin dhe besimin brenda klubit. Drita tashmë po shihet si përfaqësuese serioze e Kosovës në skenën ndërkombëtare dhe synon të vazhdojë me rezultate pozitive.
