Analisti Xhavit Drenori ka vlerësuar se deklarata e kryeministrit Albin Kurti gjatë takimit me Përfaqësuesen e Lartë të Bashkimit Evropian për Politikë të Jashtme dhe Siguri, Kaja Kallas, se Kosova do të angazhohet që verdikti i Gjykatës Speciale ndaj ish-krerëve të UÇK-së të korrigjohet në shkallën e apelit, rrëzon, sipas tij, tezat se Kurti nuk po bën mjaftueshëm për ish-krerët e UÇK-së.
“Kjo që i ka thënë në takim me Kallas ishte shumë e rëndësishme, sepse i rrëzon çdo tezë se takohet me një nivel kaq të lartë, siç është Kallas, dhe temë bosht e saj është pjesa e aktgjykimit dhe UÇK-së. Unë po besoj që i rrëzon të gjitha tezat se Albin Kurti nuk po bën mjaftueshëm për ish-krerët e UÇK-së”, ka thënë Drenori në emisionin “Info Nata” në Tëvë1.
Drenori ka deklaruar se çdo kritikë ndaj Qeverisë Kurti lidhur me zhvillimet e 16 shtatorit, sipas tij, mund të jetë e dëmshme për procesin e apelimit.
“Unë jo vetëm që mendoj dhe besoj, por jam thellësisht i bindur që çdo hedhje e shigjetave në drejtim të Qeverisë Kurti për këtë që ka ndodhur më 16 shtator është gabim i pariparueshëm për vetë mbrojtjen, respektivisht për vetë procesin e apelimit, sepse as nuk e ka fajin për asgjë”, është shprehur ai.
Tutje, analisti ka bërë thirrje për koordinim ndërmjet partive politike, duke theksuar se përgjegjësia për hapat e ardhshëm duhet të jetë e përbashkët.
“Për këto veprime tash duhet koordinim, sepse duhet ta kuptojnë që fuqinë politike në Kosovë për momentin e ka Albin Kurti dhe Vetëvendosja e ka qeverinë, e ka buxhetin dhe e ka parlamentin. PDK-ja po do të bëjë ndryshime ligjore, por nuk mund t’i bëjë pa votat e VV-së. Ai e ka shtrirë dorën e bashkëpunimit, sidomos në këtë fazë pas këtij vendimi të Speciales, sepse kanë të njëjtën linjë, të gjithë janë të pakënaqur”, ka deklaruar Drenori.
Sipas tij, nismat ligjore të PDK-së janë të zakonshme, por bashkëpunimi ndërmjet partive duhet të zhvillohet në një formë tjetër.
“Nismat ligjore, si ajo e PDK-së, janë krejt normale, por nëse duan të arrijnë qëllimin, unë po besoj që bashkëpunimi duhet të bëhet në tjetër formë dhe jo publikisht. Sepse publikisht, së pari, Albin Kurti e ka të fituar publikun, sepse as nuk e ka votuar Gjykatën Speciale dhe as nuk i ka ndalur fondet për përkrahje, qoftë të familjarëve për vizita, qoftë për ata”, ka thënë Drenori.
Ndryshe, kryeministri Albin Kurti ka takuar Përfaqësuesen e Lartë të Bashkimit Evropian për Politikë të Jashtme dhe Siguri, Kaja Kallas, ndërsa i ka theksuar se Kosova do të angazhohet që verdikti i Gjykatës Speciale ndaj ish-krerëve të UÇK-së të korrigjohet në shkallën e apelit.
Ai i ka vlerësuar të rënda dhe të padrejta dënimet ndaj ish-krerëve, ndërsa ka theksuar se Ushtria Çlirimtare lindi si përgjigje ndaj represionit, vrasjeve e masakrave, dëbimeve masive e spastrimit etnik nga Serbia dhe se lufta e saj për liri ishte e drejtë dhe e pastër./teve1.info/
Kurti-Kallasit: Kosova do të angazhohet që verdikti i Speciales të korrigjohet në Apel
