Pas rezultateve zhgënjyese, Chelsea shkarkoi trajnerin Graham Potter me këtë të fundit që nuk mundi ta mbyllte sezonin e parë me “Blutë e Londrës”. Kështu, pas Thomas Tuchel në fillim, Potter u bë i dyti trajner që larguan drejtuesit e klubit anglez të cilët duke i dhënë fund marrëveshjes me trajnerin britanik, rëndojnë edhe më tepër bilancin financiar.
Potter dhe Tuchel i kanë kushtuar arkave të Chelseat mbi 50 milionë paund. Kujtojmë se fillimisht, “Blutë e Londrës” paguan 22 milionë paund për të mbyllur kontratën e Potter me Brighton, ndërsa më pas i lidhën teknikut britanik një pagë prej 7 milionë paund. Tashmë që u shkarkua, Chelseat i duhet të paguajë edhe 13 milionë paund në drejtim të Potter. Nga ana tjetër, Tuchel që u shkarkua në fillim të shtatorit, përfitoi gjithashtu shifrën e 10 milionë paundëve.
Por, bilanci rëndohet edhe më tej nëse kalojmë te dy merkatot e fundit të londinezëve, aty ku shpenzimet janë bërë pa përdorur makinë llogaritëse. Javën e kaluar, Chelsea publikoi një humbje prej 121 milionë paund nga sezonin 2021/22, por këtu nuk përfshihen plot 550 milionë paund shpenzime prej momentit kur Todd Boehly mori presidencën e klubit verën e kaluar.
Këto shifra “trembin” klubin në lidhje me Fair Playn Financiar, vendosin me “shpatulla pas murit” Chelsean që në merkaton e verës duhet të nxjerrë një pjesë të mirë të lojtarëve në merkato, për të mbuluar deri diku humbjet masive të klubit në vitin e fundit.
