Drejtoria e Transformimit të Prishtinës ka dorëzuar sërish projektin e plotësuar për rregullimin e sheshit “Xhorxh Bush”.
Drejtori i kësaj drejtorie, Gëzim Kastrati, njoftoi se projekti përfshin ndërhyrje në infrastrukturën nëntokësore, e cila sipas tij është e vjetruar dhe paraqet rrezik për banorët.
“U dorëzua për X herë projekti me plotësime për sheshin ‘Xhorxh Bush’ në mënyrë që të vazhdojnë punimet në ndërrimin e infrastrukturës nëntokësore tashmë të stërvjetëruar dhe të rrezikshme për shëndetin e banorëve,” ka shkruar Kastrati.
Ai shprehu shpresën që institucionet përkatëse ta shqyrtojnë projektin në mënyrë konstruktive dhe me qasje pragmatike, duke e konsideruar atë me rëndësi publike për qytetarët.
“Shpresojmë për një qëndrim konstruktiv dhe pragmatik të institucioneve relavante në analizimin e këtij projekti si nevojë e shtuar e qytetarëve me karakter dhe benifit publik”, ka përfunduar ai.
