Kampionia kosovare në boks Donjeta Sadiku, ka festuar medaljen e artë, duke ia dedikuar suksesin edhe punës dhe përkrahjes së trajneres së saj, Marjola Sallaukës.
Përmes një postimi, sportistja ka thënë se pas medaljes qëndrojnë shumë sakrifica, punë dhe një besim i palëkundur, ndërsa ka veçuar rolin e trajneres së saj gjatë gjithë rrugëtimit.
“Disa fitore shihen me sy, por kjo ndihet me zemër”, ka shkruar ajo.
Ajo ka theksuar se medalja përfaqëson djersën, lotët dhe përkushtimin e saj, por edhe punën e përbashkët me trajneren Sallauka.
“Kjo medalje mban djersën, lotët dhe zemrën time, por pas saj qëndron edhe një luftë e madhe, një besim i palëkundur dhe një femër që ishte aty në çdo hap — trajnerja ime, Marjola Sallauka”, ka deklaruar ajo.
Në fund, kampionia ka shprehur mirënjohje për të gjitha sakrificat dhe besimin që e kanë sjellë deri te ky sukses.
Pas fitores në gjysmëfinale ndaj grekes Sofia Legaki, Sadiku e mbylli turneun në mënyrën më të fuqishme të mundshme, me një fitore në finale ndaj një boksieres nga Serbia dhe me medaljen e artë në qafë.
