Shenjëtarja jonë, Dhurata Ibrahimi, ishte e para që garoi nga ekipi ynë në EYOF “Shkupi 2025”.
Ibrahimi garoi në disiplinën 10 metra pushkë ajrore. Rezultati i saj ishte 376.9 pikë, ndërsa renditja e 32-ta.
Dhurata ishte garuesja e vetme nga sporti ynë i shenjëtarisë që garoi në EYOF, garë kjo që vlerësohet më e forta për moshat 14-18 vjeç në Evropë.
Edhe atletët kanë nisur garat në EYOF Shkupi 2025, derisa në sesionin e paraditës janë paraqitur: Amar Maxhuni, Lorina Kadriu dhe Bardh Telaku.
Maxhuni u paraqit në 800 metra dhe bëri paraqitje të mirë, duke përmirësuar kohën e tij prej 5 sekondash, por që ishte e pamjaftueshme për t’u kualifikuar tutje.
Koha e tij ishte 1 minutë e 56.85 sekonda, me një dallim të vogël me garuesit që kaluan tutje. Renditja e tij ishte vendi i 18-të.
Kadriu garoi në 100 metra dhe pati kohën 13.73. Renditja e saj ishte e 28-ta.
Në disiplinën e njëjtë, por tek djemtë, Bardh Telaku zuri kohën 11:38, për t’u renditur i 23-ti. Të dy garojnë edhe në 200m.
Si Kadriu, ashtu edhe Telaku dhanë maksimumin e tyre, por ashtu si në sportet tjera, edhe në atletikë, konkurrenca është tejet e fortë, ku pjesëmarrës janë sportistët më të mirë të rinj të kontinentit tonë.
Edhe garuesit e notit kanë nisur sot garat në EYOF Shkupi 2025, derisa në sesionin e paraditës janë paraqitur Riga Kastrati dhe Nart Bakiu.
Riga në 100 metra stil të lirë ndali kronometrin në 1 minutë e 4.92 sekonda, duke përmirësuar rezultatin e saj për dy sekonda. Në baterinë e saj doli e para, ndërsa në renditjen e përgjithshme e 46-ta, duke pënë prapa pesë garuese.
Narti garoi në 400 metra stil i lirë dhe ndali kohën në 4 minuta e 36.72 sekonda. Në renditjen e përgjithshme ishte i 36-ti.
Të dy do të garojnë edhe në ditët në vijim.
Në ditën e parë të garave të EYOF Shkupi 2025 garuan edhe garuesit e badmintonit, Tringa Ibraj dhe Dionis Morina, të cilët ndodhen në grupe.
Të dy patën përballë kundërshtarë me përvojë, nga të cilët pësuan humbje 2:0 në sete.
Tringa ndodhet në grupin B, ku sot zhvilloi dy ndeshje, ndërsa një tjetër e luan nesër. Në përballjet e sotme deriku ishte kundërshtare e denjë, por që përvoja dhe cilësia ishin në anën e garueseve nga Belgjika dhe Suedia.
Dioni sot zhvilloi një takim ndaj garuesit të Azerbajxhanit, derisa nesër e presin dy sfida tjera.
Të dy do të garojnë në ditët në vijim edhe në disiplinën miks.
