Një ngjarje e rëndë ka ndodhur të premten në fshatin Livoç i Ulët të Gjilanit, ku një person dyshohet se ka vrarë me armë zjarri bashkëshorten e tij dhe vëllain e saj, ndërsa ka plagosur një person tjetër, djalin e axhës së bashkëshortes.
Sipas raportit 24-orësh të Policisë së Kosovës, rasti është raportuar më 9 tetor, në orën 14:26. I dyshuari, mashkull kosovar, është arrestuar nga policia pas ngjarjes.
Dy viktimat e para kanë ndërruar jetë si pasojë e plagëve të marra, ndërsa personi i tretë është plagosur dhe është dërguar për trajtim në Spitalin e Gjilanit.
Gjatë hetimeve në dy lokacione, policia ka sekuestruar katër fishekë, 21 gëzhoja dhe pesë predha. Ndërkaq, në veturën e të dyshuarit është gjetur dhe sekuestruar një pistoletë, me të cilën dyshohet se është kryer vepra. Sipas policisë, i dyshuari kishte leje të skaduar për këtë armë.
Kontrollet kanë vazhduar edhe në shtëpitë dhe pronat e të dyshuarit, me urdhër të prokurorit. Aty janë gjetur dhe sekuestruar dy armë të gjata me leje të skaduara, një pistoletë pa leje, një armë pneumatike, 520 fishekë të kalibrave të ndryshëm dhe 1 mijë e 600 diabolla për pushkë pneumatike.
Si prova materiale janë sekuestruar edhe disa telefona celularë dhe pajisje DVR për regjistrimin e kamerave të sigurisë.
Me urdhër të prokurorit, i dyshuari është dërguar në mbajtje, ndërsa trupat e pajetë të dy viktimave janë dërguar në Institutin e Mjekësisë Ligjore për obduksion.
Rasti po trajtohet nga organet kompetente.
“Fsh. Livoç i Ulët, Gjilan 09.10.2026 – 14:26. Është arrestuar i dyshuari mashkull kosovar, pasi që i njëjti ka qëlluar me armë zjarri tre viktimat, një femër-bashkëshorten e tij, një mashkull- vëllai i bashkëshortes dhe viktimën tjetër mashkull-djali i axhës së bashkëshortes. Si pasojë, dy viktimat e para kanë ndërruar jetë, ndërsa i treti ka mbetur i plagosur dhe është transportuar në Spitalin e Gjilanit. Në vendin e ngjarjes kanë dalë njësitë përkatëse policore që i kanë ndërmarrë veprimet e nevojshme hetimore. Në dy vende të ngjarjes janë sekuestruar katër fishekë, njëzetenjë gëzhoja dhe pesë predha si dhe brenda veturës së të dyshuarit është sekuestruar një pistoletë me të cilën dyshohet se është kryer vepra për të cilën i dyshuari kishte leje të skaduar. Me urdhër të prokurorit janë kryer bastisje në shtëpitë dhe pronat e të dyshuarit ku janë gjetur dhe sekuestruar dy armë të gjata me leje të skaduar, një pistoletë pa leje, një armë pneumatike, 520 fishekë kalibrash të ndryshëm dhe 1600 diabolla të pushkës pneumatike. Gjithashtu si prova materiale janë sekuestruar edhe disa telefona celularë dhe DVR të kamerave. Me urdhër të prokurorit i dyshuari është dërguar në mbajtje, ndërsa dy trupat e pajetë janë dërguar në IML për obduksion”, thuhet në raportin policor./teve1.info/
