David Beckham ka thyer heshtjen për herë të parë pas postimeve të forta në Instagram nga djali i tij, Brooklyn Beckham, të cilat ndezën një stuhi reagimesh në media dhe rrjete sociale.
Ish-futbollisti legjendar foli publikisht vetëm pak ditë pas deklaratave të bujshme të Brooklyn, ku ai akuzonte prindërit për manipulim dhe përpjekje për të dëmtuar martesën e tij me Nicola Peltz Beckham.
Gjatë një interviste në programin “Squawk Box” të CNBC-së, të martën, më 20 janar, David Beckham, 50 vjeç, zgjodhi të mos hyjë drejtpërdrejt në konfliktin familjar, por u fokusua te ndikimi i rrjeteve sociale dhe roli i prindërve në edukimin e fëmijëve.
“Gjithmonë kam folur për fuqinë e rrjeteve sociale, si për të mirën ashtu edhe për të keqen. Problemi është se ajo që fëmijët shohin sot mund të jetë e rrezikshme për shëndetin e tyre mendor. Megjithatë, unë personalisht e kam përdorur platformën time për qëllime pozitive, si puna ime me UNICEF për të ndihmuar fëmijët në mbarë botën”, u shpreh Beckham.
I pyetur në mënyrë indirekte për situatën me Brooklyn, David theksoi se ka tentuar gjithmonë t’i edukojë fëmijët e tij, Brooklyn, Romeo, Cruz dhe Harper, duke i lejuar të mësojnë nga gabimet e tyre.
“Fëmijët bëjnë gabime. Kjo është mënyra se si rriten dhe mësojnë. Ndonjëherë duhet t’i lejojmë t’i bëjnë këto gabime”, tha ai, në një deklaratë që shumë e interpretuan si një përgjigje e koduar ndaj akuzave të djalit të tij.
Reagimi i David Beckham vjen pas një serie postimesh emocionale nga Brooklyn, i cili pretendoi se prindërit e tij kishin përhapur “gënjeshtra të vazhdueshme” përmes mediave dhe kishin tentuar të minonin martesën e tij me Nicola Peltz.
Ai gjithashtu akuzoi nënën e tij, Victoria Beckham, për ndërhyrje në momente private, përfshirë edhe ditën e dasmës.
Ndërsa Brooklyn zgjodhi një ton të drejtpërdrejtë dhe akuzues, David Beckham duket se po mban një qasje më të matur, duke theksuar përgjegjësinë prindërore dhe rëndësinë e mësimit përmes gabimeve, pa hyrë në përplasje publike.
Konflikti brenda një prej familjeve më të famshme në botë vazhdon të mbetet në qendër të vëmendjes, ndërsa publiku pret të shohë nëse kjo përplasje do të sjellë pajtim apo thellim të mëtejshëm të ndarjes familjare.
Brooklyn Beckham thyen heshtjen dhe pranon përçarjen me prindërit
