Përzgjedhësi i Kombëtares së Kosovës për vajza, Sami Sermaxhaj, e ka publikuar listën e futbollisteve të ftuara për dy ndeshjet e para të edicionit të ri të kualifikimeve për Kupën e Botës 2027.
“Dardanet” do të përballen me Gjibraltarin dhe Kroacinë në fillim të muajit marsit në kuadër të Grupit 2 në Ligën C, ka njoftuar Federata e Futbollit të Kosovës.
Selektori Sermaxhaj, ka ftuar 23 lojtare për këto ndeshje që vlerësohen të rëndësishme, ndërsa grumbullimi i “Dardaneve” nis këtë javë.
Ndeshjen e parë, Kosova e luan në stadiumin “Fadil Vokrri” në Prishtinë kundër Gjibraltarit më datën 3 mars, ndërsa katër ditë më vonë, do të përballet në udhëtim me Kroacinë, saktësisht në Karlovac.
Kosova bën pjesë në Grupin C2, ku krahas Kroacisë dhe Gjibraltarit, këtë grup e përbën edhe Bullgaria.
Fituesi i grupit kalon në ‘play-off’ për kualifikim në Botëror, dhe njëkohësisht promovohet në Ligën B për ciklin e ardhshëm të Ligës së Kombeve.
Përveç fituesit të grupit, në “play-off” për Botëror do të kualifikohen edhe dy skuadrat më të mira që renditen të dyta, nga gjashtë grupet e Ligës C.
