Sekretarja e përgjithshme e Partisë Demokratike të Kosovës (PDK), Vlora Çitaku, ka reaguar pas deklaratës së kryeministrit Albin Kurti, i cili tha sonte në një konferencë për media se kërkon nga opozita kandidatë për president, krahas Feride Rushitit të nominuar nga Lëvizja Vetëvendosje.
Çitaku ka thënë se qëndrimet e opozitës që nga fillimi u dëshmuan të sakta, duke theksuar se Kurti nuk ka kërkuar asnjëherë kandidatë të opozitës për president.
Sipas saj, kryeministri ka kërkuar vetëm kundërkandidat për kandidaten e tij, me qëllim sigurimin e kuorumit.
“Pra, atë që e kemi thënë nga fillimi, doli e vërtetë: Kurti nuk ka kërkuar asnjëherë kandidatë për President nga opozita. Ai ka kërkuar kundërkandidat për të përzgjedhurin/përzgjedhurën e tij, vetëm sa për ta siguruar kuorumin. Kaq e thjeshtë. E tha vetë”, ka shkruar ajo në Facebook./teve1.info/
