Drejtuesit e Interit vazhdojnë të studiojnë profile të ndryshme për majën e sulmit. Edin Dzeko nuk mjafton, Sassuolo ka kërkesa të larta për të lënë të lirë Gianluca Scamacca, ndërsa Duvan Zapata vazhdon të jetë një objektiv.
Ndërkohë, emri i ri që ka dalë në skenë është Hugo Ekitike. 19-vjeçari francez është një nga surprizat më të bukura të këtij sezoni në Ligue 1. Ekitike është pjesë e Reims, ekip ku luajnë edhe Arbër Zeneli e Valon Berisha.
10 gola dhe 3 asiste numëron lojtari me origjinë nga Kameruni, por Interin e trembin kërkesat e larta të klubit francez, që kërkon rreth 30 milionë euro për ta lënë të lirë sulmuesin e talentuar.
Gjithsesi, Ekitike ka munguar në ndeshjet e fundit si pasojë e një tërheqje muskulore dhe drejtuesit e Reims pritet të ulin pretendimet e tyre të larta në lidhje me çmimin e kartonit.
