Noni Madueke ka marrë leje nga Chelsea për t’u larguar nga kampi stërvitor në SHBA, në mënyrë që të kryejë vizitat mjekësore me Arsenalin përpara transferimit të tij të propozuar.
Reprezentuesi anglez, 23 vjeç, nuk do të stërvitet me ekipin të premten dhe do të udhëtojë drejt Mbretërisë së Bashkuar për të finalizuar marrëveshjen.
Mes dy klubeve është arritur një akord për një transferim me vlerë 58 milionë euro, ndërsa kushtet personale me Arsenalin ishin rënë dakord më herët për një kontratë pesëvjeçare.
Madueke pritet të ndjekë gjurmët e Kepa Arrizabalagas, i cili gjithashtu iu bashkua Arsenalit këtë verë nga Chelsea.
Madueke iu bashkua Chelseat në janar të vitit 2023 nga PSV Eindhoven për rreth 35 milionë euro. Gjatë kohës së tij në “Stamford Bridge”, ai tregoi potencial të lartë me shpejtësinë dhe teknikën e tij, duke kontribuar me 17 gola dhe 8 asistime në të gjitha kompeticionet.
Megjithatë, konkurrenca në repartin ofensiv dhe strategjitë e reja të klubit kanë bërë që Chelsea ta vlerësojë shitjen e tij.
Kalimi te Arsenali shihet si një hap i rëndësishëm në karrierën e Maduekes, pasi ai do të synojë të fitojë më shumë minuta nën drejtimin e Mikel Artetës dhe të forcojë pozitat e tij në ekipin kombëtar anglez.
