Chelsea e ka fituar trofeun e garës evropiane Liga e Konferencës, duke e mposhtur në finale Real Betisin.
“Blutë” e Londrës triumfuan me rezultat 4:1, duke përmbysur epërsinë e spanjollëve nga pjesa e parë.
Skuadra e Enzo Marescas pati paraqitje fantastike në pjesën e dytë, derisa ekipi vinte nga suksesi në Premier League, duke aiguruar Ligën e Kampionëve.
Betisi pas pjesës së parë në finale të Ligës së Konferencës, udhëhiqte me golin e Abde Ezzalzouli, i cili shënoi në minutën e nëntë.
Por në finalen në Wroclaw të Polonisë, anglezët shpërthyen në pjesën e dytë.
Me dy asistime të Cole Palmer, Chelsea barazoi fillimisht me Enzo Fernandez (65’) dhe kaloi në epërsi me Nicolas Jackson (70’).
Zëvendësuesi Jadon Sancho me golin e minutës së 83-të, dhe Moises Caicedo në minutën e parë të kohës shtesë, i dhanë fund dilemës së fituesit për të nisur festën në kampin londinez.
Trofeu i Conference League e bën Chelsean skuadrën e vetme në Evropë që fiton të gjitha kupat evropiane në futbollin modern.
