Shqipëria ka hapur sot grupkapitullin e fundit të negociatave të anëtarësimit me Bashkimin Europian, atë të “Bujqësisë dhe Kohezionit”, duke përmbyllur fazën e parë të procesit negociues.
Kryeministri Edi Rama në konferencën për shtyp me Marta Kos, Komisionere për Zgjerimin në Bashkimin Europian, dhe Marie Bjerre, Ministre e Punëve të Jashtme të Danimarkës, e cila mban Presidencën e Këshillit të BE-së, deklaroi se hapja e grupkapitullit të fundit përbën një moment historik për Shqipërinë.
“Ndihemi për plot energji dhe në borxh nëse nuk realizojmë në kohën e duhur. Jam i frymëzuar nga të gjithë këta muaj dhe nga mbështetja e fortë që procesi i zgjerimit apo ribashkimit të Evropës po merr. Do bëjmë gjithçka kemi në dorë për të ecur përpara me të njëjtin intensitet e disiplinë dhe me të njëjtën punë të madhe për të dhënë rezultate e për tu siguruar se ky proces që po ndërtojmë të mos ndalet,” u shpreh ai.
Kryeministri garantoi se Shqipëria do të vijojë me të njëjtin ritëm pune në mënyrë që të sigurohet që procesi i anëtarësimit europian të mos ndalet.
“Do bëjmë gjithçka kemi në dorë për të ecur përpara me të njëjtin intensitet, disiplinë dhe me të njëjtën punë të madhe për të dhënë rezultate, për të siguruar që ky proces të mos ndalet.”, tha ai.
Kryeministri Rama vuri më tej theksin te mbështetja e jashtëzakonshme qytetare për integrimin, duke shtuar se 90% e qytetarëve kërkojnë prezencën e Shqipërisë në tryezën e BE-së.
“Sot Shqipëria del me krenari nga kjo fazë e parë dhe me një ndjenjë të madhe përgjegjësie. Ne nuk përfaqësojmë parti politike, por një komb të tërë që mbështet si askush tjetër BE-në dhe anëtarësimin në BE më shumë se 90% e qytetarëve tanë. Jam i sigurt se ata shumë pak që janë në këtë % të vogël që mbetet thjesht s’do kenë pasur ditë të mirë sepse vështirë të mendoj ndonjë shqiptar që anëtarësimi në BE nuk është ideja më e mirë dhe horizonti ku duhet të synojmë.”, u shpreh Rama./rtsh.al/
