Blerësit e mundshëm të kampionit evropian Chelsea raportohet se tani kanë afat deri këtë të premte për të dorëzuar propozimet e tyre për blerjen e skuadrës londineze.
Pronari i Chelseat Roman Abramovich, i cili është sanksionuar nga Qeveria e Britanisë së Madhe për lidhjet e tij me presidentin rus Vladimir Putin, është diskualifikuar si drejtor i klubit nga Premier Liga angleze.
Biznesmeni dhe tifozi i Chelseat Nick Candy është shfaqur si njëri nga favoritët për ta blerë klubin si pjesë e një marrëveshjeje, ndërsa raportohet se ka interes edhe nga SHBA dhe Arabia Saudite.
Pavarësisht që janë ngrirë asetet e Abramowich, Chelsea është duke funksionuar nën një licencë të veçantë për të vazhduar aktivitetet në lidhje me futbollin.
“Raine Grup” është banka që është ngarkuar me detyrën për shitjen e Chelseat, dhe tani ka vendosur që ofertuesit kanë afat deri këtë të premte për të dorëzuar ofertat e tyre.
Shitja e shpejtë e kampionit evropian shihet si pjesë kyçe për të siguruar funksionimin edhe të ardhmen e klubit, ndërsa Qeveria e Britanisë së Madhe e ka bërë të qartë se biznesmeni Roman Abramowich nuk do të përfitojë asgjë nga shitja e Chelseat.
