Sipas Eugen Cakollit nga Instituti Demokratik i Kosovës, afati kushtetues 34-ditor për zgjedhjen e Presidentit nuk përfundon sonte, por nesër në mesnatë.
Ai ka sqaruar se, në bazë të Rregullores së Punës së Gjykatës Kushtetuese (Rregulli 29(1b)), kur një periudhë kohore shprehet në ditë, ajo fillon të llogaritet nga dita pasuese e ngjarjes përkatëse.
Në këtë rast, sipas tij, aktgjykimi i Gjykatës Kushtetuese ka hyrë në fuqi më 25 mars, ndërsa afati ka filluar të rrjedhë nga 26 marsi.
Si rrjedhojë, dita e 34-të e afatit përmbyllet më 28 prill në mesnatë.
“Afati i fundit kushtetues për zgjedhjen e Presidentit nuk është sonte. Afati 34-ditor i përcaktuar nga Gjykata Kushtetuese përfundon nesër në mesnatë. Kjo pasi që, sipas Rregullores së Punës së Gjykatës [Rregulli 29(1b)], kur periudha shprehet në ditë, ajo llogaritet nga dita vijuese pas ngjarjes, në këtë rast – vendimit përkatës. Meqë aktgjykimi në këtë rast ka hyrë në fuqi më 25 mars, afati fillon të rrjedhë nga 26 marsi, dhe dita e 34-të përmbyllet nesër në mesnatë”, ka shkruar ai në Facebook./teve1.info/
