Ish-përzgjedhësi i Kosovës në futboll, dhe njëri nga nismëtarët e çështjes së ndërkombëtarizimit të futbollit të Kosovës, Albert Bunjaki, në një lidhje direkte në emisionin VAR në Tëvë 1 të dielën, ka dalë me një propozim interesant e kuptimplotë për të nderuar një mik të madh të futbollit vendor.
Gjatë periudhës së pasluftës kur Federata e Futbollit e Kosovës po bënte përpjekje për t’u anëtarësuar në UEFA dhe FIFA, Bunjaki si trajner futbolli në Suedi dhe duke qenë se ishte i afërt me drejtues të futbollit suedez dhe me lidhjet e tij edhe në UEFA, me ish-Presidentin Lennart Johansson, ka qenë njeriu kyç në ndërmjetësimin e bisedimeve ndërmjet UEFA-së e FFK-së.
Përmes një letre ai i ka propozuar Kryetarit të Komunës së Prishtinës, Përparim Rama që të nderohet figura e z. Johansson dhe një nga rrugët e Prishtinës, pranë stadiumit “Fadil Vokrri” të emërtohet me emrin e presidentit tashmë të ndjerë të UEFA-së.
Kjo sipas Bunjakit për të shprehur mirënjohje për Johanssonin, të cilin e ka vlerësuar: “ndër të parët që e ngriti në mënyrë zyrtare çështjen e Kosovës në instancat më të larta të futbollit evropian, në një kohë kur Kosova ishte ende larg njohjes ndërkombëtare në sport”.
Në 10-vjetorin e pranimit të Kosovës në UEFA dhe FIFA, emisioni VAR në Tëvë1, ia ka kushtuar kësaj date, 3 Maj 2016, kur në Kongresin e UEFA-së në Budapest, Kosova u pranua anëtare me të drejta të plota. Bunjaki, ish-Sekretari i Përgjithshëm i FFK-së, Eroll Salihu dhe ish-nënkryetari i FFK-së, Haki Demolli, ishin pjesëmarrës në emisionin e së dielës.
Mëposhtë propozimi dhe letra e plotë e Bunjakit:
I nderuar Kryetar i Komunës së Prishtinës, z. Përparim Rama,
Po ju drejtohem me respekt të thellë për të paraqitur një propozim që besoj se ka rëndësi të veçantë historike, sportive dhe simbolike për qytetin e Prishtinës dhe për Republikën e Kosovës.
Bëhet fjalë për nderimin e figurës së z. Lennart Johansson, ish-president i UEFA-s, përmes emërtimit të një rruge në kryeqytetin tonë me emrin e tij ”Rruga Lennart Johansson”.
Z. Johansson ishte një nga figurat më të rëndësishme të futbollit evropian, por për ne në Kosovë ai përfaqëson shumë më tepër se kaq. Gjatë mandatit të tij si president i UEFA-s, ai ishte ndër të parët që e ngriti në mënyrë zyrtare çështjen e Kosovës në instancat më të larta të futbollit evropian. Në një kohë kur Kosova ishte ende larg njohjes ndërkombëtare në sport, guximi dhe vizioni i tij kontribuan në hapjen e rrugës drejt përfshirjes dhe pranimit tonë në familjen evropiane të futbollit.
Ky veprim nuk ishte vetëm sportiv, por edhe thellësisht njerëzor dhe vizionar. Ai tregoi se futbolli mund të jetë një urë lidhëse mes kombeve dhe një zë për drejtësi dhe përfshirje.
Emërtimi i një rruge me emrin e tij në Prishtinë do të ishte një akt mirënjohjeje dhe respekti institucional për një mik të madh të Kosovës. Njëkohësisht, do të shërbente si frymëzim për gjeneratat e reja, duke i kujtuar ato për rëndësinë e lidershipit, guximit dhe mbështetjes ndërkombëtare në momente kyçe të historisë sonë.
Jam i bindur se nën udhëheqjen tuaj, Prishtina ka treguar vazhdimisht vullnet për të nderuar figura që kanë kontribuar në zhvillimin dhe afirmimin e Kosovës në arenën ndërkombëtare. Në këtë frymë, besoj se ky propozim meriton shqyrtim serioz.
Ju falënderoj për kohën dhe vëmendjen tuaj, dhe shpresoj që kjo nismë të gjejë mbështetjen tuaj.
Me respekt të lartë,
Albert Bunjaki
