Drejtuesit e Dhomës së Tregtisë dhe Industrisë Kosovë, janë pritur në takim nga Guvernatori i Bankës Qendrore të Kosovës, Ahmet Ismaili, ku është diskutuar për një sërë çështjesh që preokupojnë komunitetin e biznesit në vend.
Në njoftim thuhet se, kryetari i Bordit të DHTIK-së, Skënder Krasniqi, ka theksuar sfidat kryesore me të cilat përballen bizneset, duke përfshirë qasjen në financa, problematikat në sektorin e sigurimeve dhe çështjen e Kartonit të Gjelbër, si dhe tema të tjera që lidhen me kompetencat e BQK-së.
Ndërkohë, drejtori ekzekutiv i Dhomës, Kushtrim Ahmeti, ka ngritur shqetësimin se vendi po përballet me pasoja ekonomike nga shkuarja e përsëritur në zgjedhje.
Sipas tij, ligje të rëndësishme për zhvillimin ekonomik, përfshirë SEPA-n, kanë mbetur të bllokuara për shkak të mungesës së vullnetit politik për t’i miratuar para shpërndarjes së kuvendit.
Nga ana tjetër, Guvernatori Ismaili ka falënderuar përfaqësuesit e DHTIK-së për takimin dhe ndarjen e shqetësimeve të bizneseve, duke theksuar se BQK-ja është duke u angazhuar në një sërë reformash dhe aktivitetesh që synojnë përmirësimin e sektorit financiar dhe mbështetjen e ekonomisë.
Të dyja palët kanë shprehur gatishmërinë për thellimin e bashkëpunimit ndërmjet institucioneve financiare dhe komunitetit të biznesit, me synim adresimin e sfidave aktuale dhe gjetjen e zgjidhjeve konkrete.
