Çdo gjë është gati për Kampionatin Botëror të Xhudos që nis të premten më 20 qershor ë në Budapest.
Pjesëmarrja u lejohet vetëm xhudistëve që janë në Top-100 të ranglistës botërore në secilën kategori.
Kosova në Botërorin e xhudos përfaqësohet nga tre xhudistët më në formë dhe synon medalje.
Distria Krasniqi garon në kategorinë deri 52 kilogramë, Laura Fazliu në kategorinë deri 63 kilogramë dhe Akil Gjakova në kategorinë deri 73 kilogramë.
Distria garon të shtunën, Akili të dielën dhe Laura të hënën.
Gjithsej në Kampionatin Botëror, që është ngjarja më e rëndësishme e vitit në xhudo, marrin pjesë 557 xhudistë nga 93 vende të ndryshme.
Megjithatë gjendja e ekipit nuk është më e mira këtë herë.
Laura Fazliu është bartësja e katërt në kategorinë deri 63 kilogramë, por ajo nuk ka garuar që nga 7 marsi për shkak të një lëndimi.
Akil Gjakova është bartësi i tetë në kategorinë me konkurrencë shumë të madhe, atë deri 73 kilogramë.
Por Akilin po e mundon një lëndim në krah dhe nuk ka pasur fazën përgatitore më të mirë për Botëror.
Ndërkohë Distria Krasniqi është bartëse e dytë në kategorinë deri 52 kilogramë. Distria është në formë të mirë, plotësisht e gatshme dhe shumë e uritur për sukses tjetër. Distria më 23 prill e fitoi titullin e kampionit të Evropës dhe tani synon medalje botërore.
