Shorti për fazën e grupeve të Kampionatit Botëror 2026 do të hidhet në fillim të muajit dhjetor, por renditja më e fundit e publikuar nga FIFA ka dhënë një pasqyrë të qartë për atë që pritet, një turne me përballje të zjarrta që në grup.
Sipas formatit të ri të FIFA-s, 12 vendet që do të jenë koka grupi për shortin janë nëntë përfaqësuese me renditjen më të lartë në botë, së bashku me tri vendet organizatore: Kanada, SHBA dhe Meksikë.
Në renditjen e muajit korrik, Gjermania ka bërë një hap të madh përpara, duke parakaluar Kroacinë dhe Italinë dhe duke hyrë në mesin e 9 kombëtareve më të mira të botës, bashkë me Argjentinën, Spanjën, Francën, Anglinë, Brazilin, Portugalinë, Holandën dhe Belgjikën.
Me këtë zhvillim, Kroacia dhe Italia pritet të mos jenë koka grupi në shortin e dhjetorit – çka do të ndikojë drejtpërdrejt në përbërjen e grupeve. Rrjedhimisht, pritet që në disa prej grupeve të përballen që në fazën fillestare emra të mëdhenj të futbollit botëror.
Gjermania, që pritet ta ruajë pozicionin e saj në renditje deri në nëntor për shkak të kalendarit më të lehtë (ndeshje ndaj Sllovakisë, Irlandës së Veriut dhe Luksemburgut), është në avantazh krahasuar me Italinë, e cila do të përballet me kundërshtarë më seriozë si Norvegjia, Izraeli, Estonia dhe Moldavia.
Në këtë mënyrë, Botërori i parë me 48 skuadra dhe me formatin e ri me 12 grupe pritet të sjellë përballje të forta që në fazën e parë, me shumë gjasa që disa prej gjigantëve të futbollit botëror të përplasen mes tyre që në grupe.
