Kapiteni i Kombëtares së Shqipërisë, Berat Gjimshiti, mund të jetë emri i radhës që do të largohet nga skuadra e Atalantas gjatë kësaj merkatoje verore.
Sipas asaj që raporton portali italian “TuttoAtalanta”, interesimi për qendërmbrojtësin shqiptar po vjen nga Lindja e Mesme.
Skuadra nga Katari, Al-Rayyan, është e gatshme të paraqesë një ofertë prej 11 milionë eurosh për kartonin e 32-vjeçarit, i cili ka qenë një shtyllë e rëndësishme në repartin defanziv të ekipit bergamask prej vitesh.
Kontrata aktuale e Gjimshitit me Atalantan skadon në verën e vitit 2026, dhe pavarësisht rolit të tij kyç, klubi italian nuk pritet të refuzojë një ofertë të konsiderueshme financiare.
Mbrojtësi me përvojë përfiton aktualisht një pagë prej 800 mijë eurosh në vit, shumë më e ulët në krahasim me çfarë mund t’i ofrohet në Katar.
Gjimshiti, i cili u transferua te Atalanta në vitin 2016 nga Zurichu, ka qenë një prej figurave më të qëndrueshme të skuadrës.
