Gazetari, Mirlind Behluli duke komentuar avancimin e Kosovës drejt rrugës për t’u anëtarësuar në Këshillin e Evropës, ka thënë se anëtarësimi eventual i Kosovës në këtë këshill është suksesi i vetëm i rëndësishëm i kryeministrit, Albin Kurti në Politikën e Jashtme.
Behluli ka evidentuar një marrëdhënie paradoksale të kryeministrit Kurti me ndërkombëtarët.
Ai ka thënë se është paradoksale që Kosova duke qenë nën sanksione arrin një sukses të jashtëzakonshëm, siç është hapi i radhës pozitiv drejt anëtarësimit në KiE.
“Ajo që duhet thënë së pari është që Anëtarësimi eventual i Kosovës në Këshillin e Evropës është suksesi i vetëm i rëndësishëm i Albin Kurtit në Politikën e Jashtme. Është një lloj marrëdhënie paradoksale e ndërkombëtarëve me Albin Kurtin, në njërën anë ne nuk duhet të harrojmë që jemi nën masa, nën sanksione kufizuese, ndërsa në anën tjetër ne e kemi një sukses të jashtëzakonshëm për Kosovën që është avancimi drejt anëtarësimit në Këshill të Evropës”, është shprehur ai në emisionin “Këndi i Debatit” në TËVË 1.
Më tej, Behluli vlerëson se Kurti ka filluar të pjekët politikisht duke e luajtur rolin e një stabilokrati.
Për Behlulin një gjë e tillë është mirë për Kosovën.
Më tej, ai ka theksuar se për shënimin e suksesit në rrugën drejt KiE, rol të jashtëzakonshëm kanë pasur ndërkombëtarët, veçanërisht ShBA-të.
“Përveç kësaj, Albin Kurti është shndërruar në një stabilokrat, ai tash plotëson kushtin dhe hyn një diplomaci të transaksioneve, i nënshkruan 24 hektarë për manastirin e Deçanit për të marrë anëtarësimin. Albin Kurti është duke u pjekur politikisht, kjo është mirë për Kosovë, mund të jetë keq për militantët e tij. Çka duhet me cek është që ndërkombëtarët kanë luajtur rol të jashtëzakonshme në këtë pjesë, janë strumbullari i krejt këtij suksesi, pa diplomacinë e Amerikës kjo nuk do të realizohej, normalisht që edhe qeveria i ka meritat e veta që ka arritur t’i bind ndërkombëtarët që Kosova e meriton të jetë në Këshillin e Evropës”, ka shtuar ai.
Kujtojmë që, Komiteti për Politikë dhe Demokraci i Këshillit të Evropës ka miratuar raportin e raportueses për Kosovën, Dora Bakoyannis, ku rekomandohet që shteti ka përmbushur kushtet për t’u bërë anëtare e plotë e Këshillit të Evropës. Raporti është votuar me 31 vota për, 4 kundër dhe 1 abstenim.
