Në betimin e tij si president i rizgjedhur i Serbisë, Aleksandar Vuçiq, u zotuar se përveç Serbisë do të angazhohet edhe për ruajtjen e Kosovës, siç pretendon ai, brenda integritetit të vendit të tij.
As kjo deklaratë, e as fakti që Serbia ende e mbanë brenda Kushtetutës së saj Kosovën, nuk ka ngjallur ndonjëherë, reagimin zyrtarë të institucioneve ndërkombëtare.
Profesori universitar Afrim Hoti, thotë se Bashkimi Evropian, nuk reagon ndaj deklaratës së Vuçiqit pasi i mungon qëndrimi për këtë çështje.
“Komuniteti ndërkombëtar është definitivisht i dezorientuar në këtë pikë, qoftë nëse i referohemi si Bashkim Evropian, sepse BE si strukturë nuk ka një qëndrim të unisuar, kundrejt Serbisë. Dhe se ata normalisht nuk kanë komoditetin e as nuk kanë të drejtën që t’i përzihen një vendi të pavarur për të shprehur aspiratat e veta. Çfarë do të jetë epilogu, varet fund e krye nga qëndrimet e palëve. Serbia asnjë herë nuk e ka fshehur objektivin e vet që ta ri-integroi Kosovën në strukturën e saj, ashtu siç Kosova nuk e ka fshehur objektivin e vet që të forcoi subjektivitetin e vet ndërkombëtar”, tha Hoti.
Analisti Politik nga Shqipëria, Mustafa Nano, në një deklarim për tëvë1 tha se Bashkimi Evropian nuk është në pozitë, që ta kundërshtoi Serbinë në këtë pikë.
“Evropa nuk ka shumë hapësirë për të reaguar ndaj këtij provokimi të Vuciqit, sepse në këto rrethana, rrethanat e luftës midis Rusisë në njërën anë dhe perëndimit në anën tjetër, Evropa nuk do të donte ta humbiste Serbinë. Nuk ka luksin që t’i thotë Serbisë, dëgjo zotrote e ke tepruar tani, prandaj ti e ke humbur të drejtën për të kandiduar për të qenë pjesë e Bashkimit Evropian, me ty nuk kemi më punë. Nëse Evropa e bënë këtë gjë, është e gatshme Rusia të përforcoi marrëdhëniet mes vetës dhe Serbisë”, tha Nano.
Ndaj deklaratës së Vuçiqit për Kosovën ka reaguar edhe, deputetja gjermane Renata Alt e cila ka kërkuar ngrirjen e menjëhershme të bisedimeve për anëtarësimin e Serbisë në BE.
Raporti i gazetarit Valmir Gallopeni.
