Deputetja e zgjedhur e Lidhjes Demokratike të Kosovës, Hykmete Bajrami ka reaguar ndaj gjendjes në sektorin e shëndetësisë, duke akuzuar qeverinë për keqmenaxhim dhe korrupsion, të cilat, sipas saj, kanë sjellë përkeqësimin e sistemit shëndetësor gjatë viteve të fundit.
Përmes një deklarate publike, Bajrami tha se gjendja reale e institucioneve shëndetësore nuk matet me konferenca për media apo statistika zyrtare, por me kushtet në të cilat trajtohen pacientët dhe punon stafi mjekësor.
Ajo u bëri thirrje qytetarëve të vizitojnë klinikat e Pediatrisë, Gjinekologjisë, Onkologjisë, Ortopedisë dhe Emergjencës për të parë, sipas saj, mungesën e barnave dhe materialeve, listat e gjata të pritjes dhe vështirësitë me të cilat përballen pacientët.
Bajrami theksoi se mjekët dhe infermierët nuk janë përgjegjës për gjendjen aktuale, duke vlerësuar se ata vazhdojnë të punojnë në kushte të vështira për ta mbajtur funksional sistemin shëndetësor.
Sipas saj, pavarësisht buxheteve të mëdha të ndara ndër vite, qytetarët vazhdojnë të përballen me mungesa të barnave, materialeve mjekësore dhe furnizimeve bazë. Ajo ngriti shqetësime edhe për furnizimin me terapi për pacientët me kancer të gjirit, duke pretenduar se në disa raste ata detyrohen t’i sigurojnë vetë barnat.
Deputetja e zgjedhur e LDK-së e lidhi gjendjen në shëndetësi me, siç u shpreh ajo, korrupsionin dhe keqqeverisjen, duke theksuar se përgjegjësinë politike e mban pushteti aktual.
“Nëse dështon shëndetësia, nuk dështon vetëm qeveria, por dështon shteti”, deklaroi Bajrami.
Reagimi i saj vjen pasi Qendra Klinike Universitare e Kosovës (QKUK) njoftoi se ka formuar një komision ad-hoc për të hetuar administrativisht rastin e trajtimit të një fëmije në Klinikën e Pediatrisë, pas shqetësimeve të ngritura publikisht nga familjarët./teve1.info/
