Një rrahje është raportuar sot brenda objektit të komunës së Prishtinës, ku të përfshirë dyshohet se ishin asamblisti i LDK-së, Sami Salihu, dhe kryesuesi i Kuvendit Komunal, Fehmi Kupina.
Në pamjet e publikuara nga Nacionale, shihej momenti kur Salihu përcillet nga Policia, ndërsa Kupina dërgohet në Ambulancë.
Pas ngjarjes, Sami Salihu ka reaguar publikisht përmes një postimi në Facebook, duke mohuar akuzat se ka sulmuar me shishe.
Salihu u kërkoi falje familjes, qytetarëve dhe shoqërisë për shqetësimin e krijuar, duke theksuar se situata e sotme ishte pasojë e provokimeve dhe ofendimeve ndaj tij:
“Reagim!
Nuk kam sulmuar askënd me shishe.
Sot u sulmova papritmas dhe reagova vetëm për t’u mbrojtur. Kamerat e vendit të ngjarjes do ta tregojnë të vërtetën dhe unë do të bashkëpunoj plotësisht me organet hetimore. Dhuna, sidomos ajo pas shpine, është e papranueshme.
Ju kërkoj falje familjarëve të mi, shoqërisë dhe mbi të gjitha qytetarëve që janë shqetësuar nga kjo situatë. Kjo nuk është natyra ime dhe nuk pasqyron as vlerat që përfaqësoj. Ajo që ndodhi ishte pasojë e provokimeve, ofendimeve dhe sulmit të padrejtë ndaj meje.
Unë do të vazhdoj të qëndroj drejt, me dinjitet dhe me përkushtim ndaj qytetarëve që më kanë besuar. Askush nuk ka të drejtë të godasë pas shpine, dhe askush nuk do të më ndalë të punoj me përgjegjësi për Prishtinën.”
