Policia e Kosovës ka arrestuar të martën një shtetas të Malit të Zi, i dyshuar për kryerjen e veprës penale “vjedhje e rëndë”.
Sipas njoftimit zyrtar, rasti dyshohet se ka ndodhur më 28 shkurt 2025 në fshatin Sharban të Prishtinës.
I dyshuari ishte identifikuar më herët si rezultat i veprimeve operative dhe hetimore të Sektorit të Hetimeve të Kryeqytetit dhe ishte shpallur në kërkim policor.
“Drejtoria e Policisë së Kryeqytetit ka arrestuar sot një person të dyshuar për kryerjen e veprës penale vjedhje e rëndë, e cila dyshohet se ka ndodhur më 28.02.2025 në fshatin Sharban të Prishtinës. I dyshuari ishte identifikuar më herët falë veprimeve operative dhe hetimore të Sektorit të Hetimeve të Kryeqytetit dhe ishte shpallur në kërkim policor. Si rezultat i këtyre veprimeve, ai është ndaluar dhe arrestuar gjatë ditës së sotme”, thuhet në njoftim.
Në koordinim me Prokurorin e Shtetit, ai është intervistuar dhe është dërguar në mbajtje për 48 orë.
“Policia e Kosovës mbetet e përkushtuar në parandalimin dhe luftimin e veprave penale, si dhe në garantimin e sigurisë për të gjithë qytetarët”, theksohet në fund të njoftimit./teve1.info/
