Shërbimi Korrektues i Kosovës ka njoftuar se ka pezulluar nga detyra një zyrtar korrektues me inicialet S.D, i dyshuar për tentativë futjeje të substancave narkotike brenda Qendrës Korrektuese të Dubravës.
Sipas njoftimit zyrtar, rastin e kanë marrë menjëherë Policia e Kosovës dhe Prokuroria e Shtetit, ndërsa i dyshuari është arrestuar dhe është në procedurë hetimore nga organet kompetente.
“Sot në Qendrën Korrektuese të Dubravës u parandalua tentativa për futjen e kontrabandës. Pas informacioneve nga institucionet e sigurisë, gjatë kontrollit të qëllimshëm në hyrje u ndalua zyrtari korrektues me inicialet S.D., te i cili u gjetën të fshehura substanca të dyshuara narkotike, që dyshohet se kishte për qëllim t’i fusë brenda institucionit. Për rastin janë njoftuar menjëherë Policia e Kosovës dhe Prokurori i Shtetit, ndërsa i dyshuari është arrestuar dhe rasti është duke u trajtuar nga organet kompetente. Shërbimi Korrektues i Kosovës ka ndërmarrë masa të menjëhershme disiplinore ndaj zyrtarit në fjalë, duke e suspenduar atë nga detyra. Vendimi për pezullim është marrë nga Komisioni Disiplinor i SHKK-së dhe masa mbetet në fuqi deri në një vendim tjetër”, thuhet në njoftim./teve1.info/
