Epiteti i futbollistit më të mirë të xhiros së 17-të në Superligën e Kosovës në futboll, i ka takuar mbrojtësit të krahut të djathtë, Armend Thaqit.
Federata e Futbollit të Kosovës (FFK), ka njoftuar të martën se çmimi “Ylli i Javës” që jepet pas përfundimit të çdo xhiroje në Superligë për futbollistin me paraqitjen më të mirë, i është ndarë Thaqit.
Thaqi është kapiten i Gjilanit dhe më i merituari që skuadra e tij mori një pikë në derbin e Anamoravës kundër Dritës.
Kjo ndeshje përfundoi pa fitues, me rezultatin 1:1 kurse Thaqi krahas paraqitjes fantastike gjatë tërë ndeshjes, e shënoi edhe golin e barazimit, një supergol nga gjuajtja e lirë.
Komisioni i Veteranëve të futbollit, e ka konfirmuar Thaqin si lojtarin më të mirë të xhiros së 17-të, i cili u shpreh tejet i lumtur me këtë vlerësim dhe pranimin e çmimit.
“Derbi i qytetit asesi nuk duhet të humbet dhe jam i lumtur që së paku kemi marrë një pikë. Nuk e kemi nisur shumë mirë kampionatin, ndonëse klubi ka bërë investime të mëdha dhe ka pasur një organizim shumë të mirë. Hallka që ka dështuar këtë vit kemi qenë ne, futbollistët, të cilët nuk kemi arritur të komponohemi mirë mes vete dhe duhet të marrim përgjegjësi. Aktualisht kemi filluar këndelljen me trajnerin e ri dhe nuk duhet të lëshojmë më pike”, ka thënë Thaqi për faqen zyrtare të FFK-së.
Gjithashtu, Thaqi shtoi se ky çmim i dedikohet bashkëlojtarëve të tij te Gjilani dhe tifozëve të klubit, duke pasur parasysh se derbi luhet për ata.
