Shefi i Grupit Parlamentar të PDK-së, Arian Tahiri, e ka cilësuar arritje të madhe miratimin e Ligjit për Ndryshimin e Ligjit për Gjykatën Speciale, duke kërkuar zbatimin e plotë të tij dhe respektimin e vendimit të Kuvendit të Kosovës.
Përmes një postimi në Facebook, Tahiri ka theksuar se ky vendim është i rëndësishëm për mbrojtjen e luftës së Ushtrisë Çlirimtare të Kosovës (UÇK) dhe garantimin e drejtësisë.
Ai ka bërë thirrje që institucionet dhe qytetarët të angazhohen për zbatimin e plotë të ligjit, pa përjashtime dhe pa paqartësi.
“Kosova është shtet sovran dhe i pavarur. Gjykata Speciale është organ i krijuar mbi bazën e rendit juridik të Republikës së Kosovës, ndërsa Kuvendi është institucioni që ushtron pushtetin legjislativ. Ligjet që miraton Kuvendi nuk janë rekomandime dhe as çështje vullneti: ato janë detyrim dhe duhet të zbatohen”, ka deklaruar Tahiri.
Ai ka shtuar se nuk duhet të ketë hezitim apo tërheqje në zbatimin e ligjit, duke theksuar se çdo përpjekje për ta shpërfillur atë do të përballet me kundërshtimin e tij.
Në fund, Tahiri ka ritheksuar se Kosova duhet të veprojë si shtet sovran dhe i pavarur, ndërsa zbatimi i plotë i ligjeve të miratuara nga Kuvendi duhet të mbetet prioritet.
