Pas një sezoni të jashtëzakonshëm me Club Brugge, mesfushori i kombëtares së Zvicrës, Ardon Jashari, pritet të ndërrojë ambient këtë verë. Disa prej klubeve më të mëdha evropiane janë vënë pas tij – mes tyre edhe gjigantët Manchester City dhe Paris Saint-Germain – por sipas raportimeve më të fundit, Borussia Dortmund ka hyrë fuqishëm në garë për shërbimet e tij dhe e ka shpallur atë objektivin kryesor të merkatos.
Në sezonin e tij të parë me Club Brugge, Jashari është shndërruar në lider të padiskutueshëm të skuadrës dhe është shpallur lojtari më i mirë i sezonit në kampionatin belg, Jupiler Pro League. Ai ka zhvilluar plot 52 ndeshje dhe ka luajtur 4,132 minuta, duke u kthyer në një figurë kyçe për ekipin që luftoi deri në fund për titullin kampion.
Edhe pse Club Brugge nuk ia doli të fitonte trofeun, për Jasharin ky sezon duket se ka qenë një trampolinë drejt majave të futbollit evropian. Mediat ndërkombëtare e kanë lidhur emrin e tij me disa nga klubet më të mëdha në kontinent, ndërsa gazetari belg Sacha Tavolieri raporton se Borussia Dortmund ka bërë hapat konkretë drejt transferimit të 21-vjeçarit.
Sipas Tavolierit, Dortmund – që e përfundoi sezonin e fundit në vendin e katërt në Bundesliga – e ka bërë tashmë Jasharin objektivin kryesor të afatit kalimtar dhe ka zhvilluar kontaktet e para me përfaqësuesit e lojtarit. Kualifikimi i sigurt në Ligën e Kampionëve për sezonin 2025/26 i ka dhënë klubit verdhezi një shtysë shtesë për të përgatitur një ofertë zyrtare drejt Club Brugge.
Një verë shumë e nxehtë duket se është në prag për Ardon Jasharin, i cili është kthyer në një nga emrat më të përfolur të merkatos evropiane. Mbetet për t’u parë se cili do të jetë destinacioni i tij i radhës: Premier League, Ligue 1 apo Bundesliga.
