Kryetari i LDK-së, Lumir Abdixhiku, përmes një mesazhi ka uruar Qeverinë dhe popullin e Shteteve të Bashkuara të Amerikës, për 248 vjetorin e shpalljes së pavarësisë.
Kreu i LDK-së ka theksuar se 4 korriku i vitit 1776 shënon datën e lindjes së një vendi që identifikon luftën për lirinë e të gjithë popujve, për demokracinë dhe prosperitetin në botë.
“Në historinë politike të krijimit të shteteve, ShBA-të janë themelues dhe pishtar i të drejtës universale për të jetuar të lirë secili popull kudo në botë. Sot, Shtetet e Bashkuara të Amerikës janë sinonim i kombit të madh, që angazhohet përherë për një botë më paqësore dhe më të sigurt. Ato janë motiv dhe model i shumë popujve anekënd globit për liri, paqe e demokraci”, ka thënë Abdixhiku.
Tutje i pari i LDK-së ka vlerësuar mbështetjen e madhe të ShBA-së për Kosovën, teksa ka thënë se ShBA-të kanë qenë, janë dhe do të mbesin aleat i përhershëm strategjik.
“…pa mbështetjen e të cilëve vendi ynë do ta kishte të pamundur lirinë, krijimin dhe konsolidimin e shtetit. Aleanca me ShBA-të është e përmbledhur qartë në postulatin e atit themeltar të Republikës, Presidentit Historik Rugova: ‘Kosova shtet i pavarur e sovran, i integruar në NATO e BE, dhe me miqësi të përhershme me Shtetet e Bashkuara të Amerikës’. Vizioni politik i yni është i qartë; duhet ta ndjekim orientimin natyral politik drejt vlerave perëndimore e integrimin në strukturat euro-atlantike”, ka shtuar Abdixhiku.
