Kryetari i Lidhjes Demokratike të Kosovës, Lumir Abdixhiku, tha se nga dy formulime të marrëveshjes së dakorduar në Bruksel, tejkalohet e kaluara mes Kosovës dhe Serbisë.
Gjatë diskutimit të sotëm në Kuvendin e Kosovës, Abdixhiku, shtoi se përveç që është shqetësuese që kjo marrëveshje nuk përmban njohjen e ndërsjellë, ai tha se kjo marrëveshje nuk është prezantuar fare në Kuvend, përcjell teve1.info.
“Këtë javë më 27 shkurt, në takimin në Bruksel mes Kosovës dhe Serbisë, është arritur dakordimi për një marrëveshje drejt normalizimit të marrëdhënieve mes të dyja shteteve. Nga ky publikim i kësaj marrëveshje, u vërtetuan të gjitha brengat tona të ngritura në këtë Kuvend, ajo as nuk ishte finale, as nuk përmbante njohjen e ndërsjellë në qendër të saj, siç ishte orientimi i institucioneve të Kosovës tash e dy vite, e siç ishte edhe mbështetja ndërkombëtare tash e dy vite. Në këtë marrëveshje, ka dy formulime skandaloze e të rënda, me dëme historike për Kosovën. I pari ka të bëjë me tejkalimin e trashëgimisë së të kaluarës, ndërsa i dyti pa paragjykim të palëve mbi çështjen e statusit. Këto dy formulime, tejkalohet e kaluara mes Kosovës dhe Serbisë, pra me dakordim të palëve, përfshirë krimet, masakrat”, deklaroi Abdixhiku para deputetëve.
Madje sipas tij, kryeministri i vendit Albin Kurti dhe presidenti i Serbisë, Aleksandar Vuçiq, kanë vendosur ta tejkalojnë të kaluarën vetëm me një copë letër.
“Në vend të ballafaqimit të Serbisë me të kaluarën, kryeministri Kurti dakordohet për tejkalim të trashëgimisë. Tani mos njohja e Serbisë barazohet me vet aktin e deklarimit të shpalljes së pavarësisë së Kosovës”, potencoi Abdixhiku tutje./teve1.info/.
