Bojkotimi i marketeve zgjati vetëm një ditë.
E çmimet po vazhdojnë të jenë të njëjta.
Se a ishte datë e duhur 10 shkurti për bojkot, një ditë pas zgjedhjeve, tregon Selatin Kaçaniku nga Shoqata “Konsumatori”.
“Data ka qenë jashtëzakonisht e duhur, çunat dhe çupat kanë dëshmuar pjekuri më të madhe se partitë politike sepse ata e kanë respektuar fushatën zgjedhore nuk kanë dashtë të prishin klimën politike ndërsa vet politikanët me sjelljet e tyre e kanë prishë atë klimë, tha Selatin Kaçaniku nga OJQ “Konsumatori”.
E sipas tij, ky bojkotim do të zgjasë.
Madje planifikohen edhe protesta nga qytetarët.
“Pa konsum dhe pa konsumatorë s’ka zhvillim ekonomik, pa tregti nuk ka biznes s’ka ekonomi e prodhim. Asnjëra nuk mund të ekzistojë. Prandaj kjo do të zgjasë deri sa të gjithë së bashku ta njohin vetveten si faktorë të rëndësishëm, si kompenentë kryesore e pastaj deri sa të gjithë të fillojnë ta zbatojnë të paktën ligjin për mbrojtjen e konsumatorit, ligjin mbi standardizimin, ligjet mbi ushqimet dhe të gjitha me radhë”, tha Kaçaniku.
Rritjen e vazhdueshme të çmimeve, shqetësuese po e sheh edhe ekonomisti Jakup Bellaqa.
“Tek ne cmimet janë duke i caktuar marketet apo rrjeti i marketeve, faktikisht aty ka monopol të fshehur aty ka çmime më të larta se sa tregu edhe se sa të rajonit. Duhet me përgatit një ligj të posaçëm për produktet elementare bazike për të gjitha produktet, higjienës”, tha Jakup Bellaqa.
Afër 7 mijë qytetarë i janë bashkangjitur një grupi në rrjetin social “Facebook”, me emrin “Kosova Bojkoton”.
Aty vazhdimisht po kërkohet që bojkotimi i marketeve të vazhdojë deri sa të reflektojnë edhe vetë marketet kosovare.
