Qytetarët të cilët e mbushën veturën e tyre me naftë orët e para të mëngjesit të së shtunës paguan 1.75 euro për litër.
Por nga ora 10:00 e mëngjesit çmimet e derivateve të naftës zbritën.
Kjo pasi Ministria e Tregtisë rivendosi çmimet maksimale të lejuara për këto produkte.
Kështu që çmimi i naftës ra në 1.67 euro, ndërsa ai i benzinës mbeti 1.39, kurse i gazit 76 centë.
Në një përgjigje për televizionin, ministria tha se e riktheu çmimin tavan për shkak të gjetjeve në treg, nga inspektimet e kryera që nga 1 tetori.
“Nga data 1 tetor inspektorati i tregut ka monituar tregun me qëllim të vlerësimit nëse ekziston shkaku (lëvizje të mëdha të çmimeve dhe mos përshtatje e çmimit me lëvizjet e shteteve tjera), për nxjerrjen e një Vendimi tjetër/apo zgjatje të afatit të Vendimit për përcaktim të çmimeve. Ministrja e MINT bazuar edhe në evidencën dhe gjetjet në tregun e brendshëm, me datë 06/10/2022 ka nxjerr Vendimin nr.6094-01, me të cilin ka caktuar marzhën tregtare deri në 2 eurocent për shitësit me shumicë dhe 12 eurocent për shitësit me pakicë të derivateve të naftës”, tha këshilltari për media në MINT, Uliks Spaçi.
Spaçi tutje shtoi se inspektorati gjatë ditës ka shqiptuar gjoba për subjektet që nuk e kanë zbatuar vendimin.
Edhe qytetarët u shprehën gjatë ditës se Qeveria duhet të vazhdojë të caktojë çmimet tavan për produktet e naftës.
Madje dikush u shpreh se duhet të shtohen kontrollet ndaj naftëtarëve.
Me vendimin e marrë gjatë shtatorit, ministria arriti ta ulte çmimin e naftës deri në 1 euro e 57 centë kurse të benzinës në 1.34.
Vendimi i hyrë në fuqi këtë të shtunë është i vlefshëm deri më 7 nëntor.
Kronika e realizuar nga gazetari Gojart Jashari.