Është ora 8:00 e mëngjesit.
Por, punëtorët e Ndërmarrjes Publike “Infrakos”, nuk ndodhen në vendin e tyre të punës.
Këta për një orë, dolën të protestojnë në binarët ku çdo ditë kalojnë trenat.
Përmes kësaj proteste, punëtorët e “Infrakos” po i shprehin pakënaqësitë e tyre në lidhje me pagat.
“Po kena protestu, po e shihni edhe vetë, rritja ekonomike e ka bo të veten, po rriten çmimet për çdo ditë edhe na kemi kërku që pagat tona të rriten”, tha Hajdin Osmani (punëtor).
E sipas kryetarit të Sindikatës së punëtorëve në “Infrakos”, ka dallimin mes përgjegjësive në punë dhe nivelit aktual të pagave.
“Punëtorët janë shumë të pakënaqur për trajtimin e tyre, sepse edhe pjesa tjetër, inflacioni, është në rritje e sipër edhe pagat tona janë shumë të ulëta… Një pastrues, një punëtor i thjeshtë që i është ngritur paga në 500 euro, e ka arritur një zyrtar që ka përgjegjësi shumë më të mëdha, ka angazhime shumë më të mëdha dhe tani me pagë janë të barabartë”, deklaroi Hysen Nikçi, kryetar i sindikatës së “Infrakos”.
Si pasojë e protestës, për 1 orë u ndalua edhe qarkullimi i trenit.
“Për sot e kemi paralajmërua një protestë njëorëshe si veprim sindikal, e kemi ndalë edhe qarkullimin e trenit që qarkullon Prishtinë–Pejë”, theksoi Nikçi.
Nga sindikata thonë se kërkesa e tyre për indeksimin e pagave drejt “Infrakos”-it nuk mori përgjigje.
“Paga minimale i ka prekë diku 147 punëtorë, që në rregull është, e mirëseardhur për ta, por pjesa tjetër, që do të thotë e kanë pas rrogën 500 e sipër, tani janë ngulfate. Ne kemi bo shkresa të vazhdueshme menaxhmentit, bordit edhe pa rezultat”, tha Hysen Nikçi.
E nëse do të merren parasysh kërkesat e punëtoreve, Tëvë1 ka pyetur edhe në Ndërrmarjen Publike “Infrakos”.
Por këta të fundit, nuk kanë kthyer përgjigje.
Ndërkohë nga sindikata, thonë se veprimet sindikale nuk do t’i ndalin deri në plotësimin e kërkesave të tyre.
