Ministri në detyrë i Financave, Hekuran Murati, ka reaguar pas njoftimit të Kryetarit të Prishtinës, Përparim Rama, lidhur me përkrahjen e operatorëve në procesin e financimit për 15 autobusë elektrikë dhe 2 tramvaje që pritet të vijnë në kryeqytet.
Murati ka akuzuar Komunën e Prishtinës se nuk ka ndjekur procedurat e parapara me Ligjin për Partneritet Publiko-Privat, duke thënë se kjo rrezikon keqpërdorimin e parasë publike.
Sipas tij, edhe pse shërbimet publike si transporti mund të ofrohen përmes operatorëve privatë, kjo duhet të bëhet vetëm sipas procedurave ligjore të përcaktuara në kuadër të PPP-së.
“Ofrimi i shërbimeve publike siç është transporti publik, mund të bëhet edhe përmes operatorëve privatë siç po dëshiron ta bëjë Komuna e Prishtinës, mirëpo kjo gjë duhet të bëhet sipas procedurave që parashihen në Ligjin për Partneritet Publiko Privat, për t’u siguruar se paraja publike nuk keqpërdoret. Komuna e Prishtinës nuk ka ndjekur asnjë procedurë që e obligon Ligji në fuqi, prandaj çfarëdo aranzhimi, marrëveshje apo kontrate që është nëshkruar në lidhje me këtë çështje, ajo është në shkelje të plotë të Ligjit për Partneritet Publiko Privat”, ka deklaruar Murati në një postim në Facebook.
Ai ka kërkuar që organet e rendit të ndërhyjnë sa më shpejt për të parandaluar, siç ka thënë ai, keqpërdorimin e mundshëm të fondeve publike.
“Organet e rendit do duhej të vepronin sa më parë në lidhje me këtë rast në mënyrë që të parandalohet keqpërdorimi i parasë publike”, ka përfunduar ai.
Ndryshe, kryetari i Prishtinës, Përparim Rama, të mërkurën, ka prezantuar foto se si do të duken 15 autobusë elektrikë dhe dy tramë, por nuk ka treguar datën se kur do të vijnë./teve1.info/
Prishtina drejt transportit elektrik, sigurohet financimi për 15 autobusë dhe 2 tramvajë
